Kotun Birtaniya Ta Saurari Faifan Sauti na Diezani Alison-Madueke kan Zargin Cin Hanci

A ranar Talata, Southwark Crown Court ta Birtaniya ta saurari faifan sauti da ake zargin na tsohuwar ministar man fetur ta Najeriya, Diezani Alison-Madueke, a shari’ar da ke gudana kan zargin karɓar cin hanci daga wasu attajiran mai.

A halin yanzu, Mrs Alison-Madueke na fuskantar tuhume-tuhume shida, ciki har da tuhume-tuhume biyar na karɓar cin hanci da kuma tuhuma ɗaya ta haɗa baki wajen aikata cin hanci. Dukkan tuhume-tuhumen suna da alaƙa da bayar da kwangilolin mai da iskar gas a lokacin da take kan muƙaminta.

A baya, PREMIUM TIMES ta ruwaito cewa an same faifan sautin ne a wata wayar Samsung da jami’an tsaro suka ƙwace daga hannunta lokacin da aka kama ta a Landan a shekarar 2015.

Rahoton BBC ya bayyana cewa wayar na ɗauke da tattaunawa tsakaninta da ‘yan kasuwar mai biyu — Olajide Omokore da Kolawole Aluko — kafin daga bisani ta samu saɓani da su.

Abubuwan da ke cikin faifan sautin

A cikin ɗaya daga cikin rikodin, wadda ta haɗa ta da Omokore, an ji Diezani na cewa:

“Zan yi farin cikin raka ku duka zuwa gidan yari tare da ni.
Mun yi shiru… yayin da mutane kamar matarka ke ta faman rera waƙa a ko’ina.
Ba na jin daɗin yadda ake yi min barazana.”

A wani rikodin kuma da ta yi da Aluko, ta nuna damuwa kan salon rayuwarsa, tare da sukar yadda yake bayyane da alaƙarsa da babbar jarumar fim ta Birtaniya, Naomi Campbell.

Ta gargaɗe shi da cewa irin wannan rayuwa na iya jawo hankalin hukumomin tsaro, tana cewa:

“Kai kamar ɗan wasan kwaikwayo ne.
Naomi Campbell da makamantansu ba mutanen da ya dace a rika yin faretinsu ba.
Wasu mutane suna yin irin waɗannan abubuwa, amma suna yin su a ɓoye.”

Diezani ta kuma bayyana fushinta kan zargin cewa akwai wasu bayanai da Aluko ke da su a kanta, tana cewa idan har lamarin ya kai ƙololuwa, za ta fito fili ta faɗa wa ‘yan Najeriya abin da ya faru.

“Zan zargi kaina, amma zan faɗi gaskiya a fili, mu duka mu fuskanci sakamakon.”

A nasa martanin, Aluko ya musanta cewa ya taɓa ambaton sunanta, yana mai cewa shi “mai aminci ne kamar kare”, kuma ya adana wasu muhimman takardu a akwatin ajiya domin kare kansa daga shari’a.

Zargin rayuwa mai tsada

Masu bincike sun zargi Diezani da rayuwa mai tsada wadda attajiran mai ke ɗaukar nauyinta. An ce ta yi sayen kayan alatu da katin biyan kuɗi na Kolawole Aluko, da kuma katin cire kuɗi na kamfaninsa, Tenka Limited.

Sai dai Mrs Alison-Madueke ta musanta dukkan tuhume-tuhumen da ake mata.

Lauyanta, Jonathan Laidlaw, ya shaida wa kotu cewa ba ta da cikakken iko kan manyan yarjejeniyoyin mai, yana mai cewa a lokacin da take minista a gwamnatin Goodluck Jonathan, rawar da take takawa ta kasance “kamar tambarin roba” ne kawai.

Shari’ar dai na ci gaba da gudana a kotun Birtaniya.